Gin-ako sang punong barangay sang Barangay Granada, ciudad sang Bacolod nga majority sang mga residente sang Barangay Granada ang nagaduso nga maimprove ang serbisyo sang CENECO.
Bangud sini, nagapabor sila sa joint venture agreement sa tunga sang CENECO kag More Power bangud lain man ini sa pagtake over sang isa ka pribado nga kompaniya, kundi nagapabilin ang ownership sang CENECO sa power utility.
Suno kay Talimodao, brownout ang common nga reklamo sang mga residente sang Barangay Granada kag kabudlay man magcontact sa team nga nagatroubleshoot.
Suno diri, daw balatian nga wala sang bulong ang problema sa CENECO bangud wala sang husto nga planning agud nga maaddress ang nagakatabo pirme.
Kun makasulod na ang More Power suno sa iya, kampante ini nga mahimuan na sang tikang ang common nga ginareklamo sang mga konsumidor.
Ginpasalig naman sang More Power nga mangin mahapos ang pag-apply agud nga mapatakdan sang linya sang kuryente.
Suno kay Talimodao, mas malikawan ang pilferage ukon jumper kun mahapos ang proseso agud nga makapatakod sang linya.
Wala man sang team ang CENECO nga in-charge sa paglimpyo sa mga sanga sang kahoy nga nagatandog sa distribution line gani kadugay magbalik ang supply sang kuryente.
Madamo man ini sang reklamo sa engineering department sang CENECO nga wala pa nahimuan sang nagakaigo nga tikang.
Sa karon, ginpasiguro ni Talimodao nga handa na sila para sa plebisito nga patigayunon sa Hunyo 24 kag 25.
