Makabig nga “Mini Dump Sites” sa Bacolod City, ginamonitor agud indi na mahabuyan sang basura

Ipamonitor sang Bacolod City Government ang mga lugar nga nagaserbe na nga mini dumping sites sa ciudad.

Sa interview sang Bombo Radyo Bacolod kay Bacolod City Administrator Atty Mark Steven Mayo, aminado sila nga madamo sang mga natubo nga mga mini dumping sites.

Ang mga ini ang indi husto nga halabuyan sang basura apang nakaandan na nga habuyan sang madamo nga pumuluyo.

Madumduman nga isa sa karun nga problema sang ciudad amo ang backlog sang basura nga wala mahakot sang IPM Construction and Development Corporation.

Sa karun, mandato sa International Solid Waste Integrated Management Specialists, Inc. (ISWIM) ang total clean-up sa sulod sang pito ka adlaw nga matapos na bwas.

Sunod sini sila ang magaplastar na sang collection route kag schedules sa paghakot sang mga garbage trucks.

Apang aminado si Mayo nga magasulit-sulit lamang ang problema kun padayun ang paghaboy sang basura sa indi nagakadapat nga lugar.

Gani ginapamonitor nila ang mga makabig mini dumping sites, nga mahimo hamtangan sang CCTV camera ukon pabantayan, agud indi na mahimo nga basurahan.