Gin-athag sang Human Rights Lawyer nga bisan ang Presidente ang wala sang ikasarang nga magdesisyon sa pagpakuha sang nakalubong sa Libingan ng mga Bayani.
Ini kasunod sang pahayag ni Vice President Sara Duterte nga iya nga ipakalkal ang bangkay ni late President Ferdinand Marcos Sr. kag itagbong sa West Philippine Sea kun indi untaton ang pagpamulitika sa ila pamilya.
Madumduman nga sa administrasyon ni former President Rodrigo Duterte napahanugutan ang paglubong sa amay ni incumbent President Ferdinand “Bongbong” Marcos Jr.
Sa interview sang Bombo Radyo Bacolod kay Atty Cesar Beloria, may-ara sang Republic Act 289 nga nagapasad sang guidelines sa mga mahimo malubong sa Libingan ng mga Bayani.
Antes mapahanugutan, may Board nga nagalantaw kun ang isa ka persona ang kwalipikado kag may mga requirements nga dapat mameet.
Kalakip sa mga sarang malubong sa Libingan ng mga Bayani ang mga Presidente sang Pungsod, national heroes, police generals, patriots, military veterans, former government officials, national artists, scientists, kag iban pa nga nagserbisyo kag nakahimo sang dako nga kontribusyon sa pungsod.
Paathag ni Beloria nga kun luyag gidman nga makuha sa Libingan ng mga Bayani ang bangkay, magakinahanglan nga magfile sang petisyon sa Korte Suprema kag pamatud-an nga indi nagakadapat ang isa ka persona sa nasambitan nga sementeryo.
Panindugan sang Human Rights Lawyer nga bisan ang Presidente ang indi basta makadesisyon sa pagsaylo sang bangkay, bangod may-ara sang natalana nga approving body.
Ini kaangay man sa mga local cemetery nga magakinahanglan pa sang permit gikan sa local government antes ma-exhume.
Nagalaom ang abogado nga nagalahog lamang ang Bise Presidente sa nangin pahayag, apang aminado ini nga indi nagakadapat sa 2nd highest position ang kaangay nga mga tinaga.
Suno diri, ang pahayag nga ginabuy-an sang mga yara sa matag-as nga posisyon ang mahimo mamis-interpret sang iban nga tawo gani sila ang dapat nga maghalong sa ginahambal.
