Liwat nga nadakpan bangud sa paghupot sang illegal nga druga ang mga anay priso sa ginpatigayon nga buybust operation sang Bacolod Police Station 5 sa Hacienda Rosario, Barangay Granada, ciudad sang Bacolod kahapon sang kaagahon.
Sa interview sang Bombo Radyo Bacolod kay Police Major Joery Puerto, station commander sang Bacolod Police Station 5, ginkilala ang mga nadakpan nga sanday Dante Parandas kag Christian Alvin Catalan.
Suno kay Puerto, nakuha sa paghinakop sang duha ang kapin 15 grams nga suspected shabu nga may standard drug price nga P102,000.
Ginakabig sang otoridad ang duha bilang mga street level individual.
Magapangatubang ang mga ini sang kaso nga paglapas sa Comprehensive Dangerous Drugs Act of 2002.
Nagalaom si Puerto nga indi na makagwa ang nasambit nga mga persona bangud makatatlo na ini mapriso sa pareho nga kaso.
Ginpahayag man sang station commander nga naglapad ang network sang mga drug personality bangud ginapahayag sang mga ini nga ang ila contact ang yara sa sulod sang prisuhan gani sa tion nga makagwa liwat nga naga-enggage sa illegal nga druga.
