Gin-athag sang House Deputy Minority Leader nga private citizen ang magafile sang impeachment complaint kag ini ang iga-endorso lamang sang miyembro sang House of Representatives.
Ini kasunod sa pahayag ni former Presidential Spokesperson Atty Harry Roque nga plano sang Kamara nga ma-impeach si Vice President Sara Duterte
Sa interview sang Bombo Radyo Bacolod kay Alliance of Concerned Teachers (ACT) Representative France Castro, sa political action, private citizen, individual man ukon grupo ang magafile kag ini ang iga-endorso sang isa sa mga kongresista.
Apang sa karun sila sa Makabayan Bloc ang wala paman sang ideya tuhoy sa ginapahayag plano nga impeachment.
Suno kay Castro, sa nabatian sini sa iya mga kaupdanan nga Kongresista, ang impeachment ang mahimo bangod sa mga isyu angot sa mga bayolasyon sang Bise Presidente sa konstitusyon kaangay sang kurapsyon.
Kalakip diri ang kontrobersyal nga paggasto sang P125 million confidential funds sa sulod lamang sang onse ka adlaw, nga sa iya paglantaw makabig bayolasyon sa layi.
Apisar nga may pending case sa korte, paathag ni Castro nga mahimo gihapon ang impeachment procedure bangod separado nga entity ang legislative kag judiciary department.
Suno diri, kun may magafile sang impeachment complaint, ila pa ini nga tun-an kun nagakadapat nga suportahan.
