Makaligad ang pito ka bulan, natumod kag nadakpan na sang mga otoridad sa banwa sang Murcia ang suspetsado sa ginaalegar paghimulos kag pagpatay sa 10-anyos nga bata nga babayi nga nasapwan sa kampo sang tubo sa Hacienda Lizares, Bangga Delton, Purok Silhigan, Barangay San Miguel, Murcia.
Madumduman nga nasapwan sa katubuhan ang bangkay sang biktima nga si Kim Lachica kun sa diin wala na ini sang pang-idalom nga panapton sadtong Oktubre 31, 2019.
Sa interview sang Bombo Radyo kay Police Major Robert Dejucos, hepe sang Murcia Municipal Police Station, ginpahayag sini nga sang Domingo lang nag-abot ang resulta sang DNA examination nga ila ginpatigayon sa mga ginakabig nga persons of interest sang Oktubre.
Suno kay Dejucos, nalakip diri ang suspetsado nga si Edgie Gonzaga kag ang amay sini nga hilway man nga nagkooperar sa nasambit nga eksaminasyon.
Sa resulta nga naggwa sang Mayo 31, napamatud-an nga kay Edgie Gonzaga ang sperm fraction nga nakit-an sa kinatawo sang biktima.
Suno sa hepe, madamo naman sila sang may nabatian nga mga testimonya nagikan sa mga pumuluyo sa Murcia apang kinahanglan gihapon sang actual evidence kag isa diri ang DNA examination result.
Nahibaluan nga si Gonzaga ang may yara man sang record sadto nga pagbayolar sang R.A. 9165 ukon Comprehensive Dangerous Drugs Act of 2002.
Ang suspetsado ang nakahunong karon sa custodial facility sang Murcia Municipal Police Station kag natalana nga pasakaan sang kaso nga rape with homicide.
Nahibaluan nga una na ini nadakpan sang kapulisan sa ginpatigayon nga buybust operation sadtong Mayo 26.
