Nagapati ang opisyal sa probinsya sang Negros Occidental nga ang trahedya nga nagpatay sang madamo nga mga Negrense ang nagabuking sang mga tago nga illegal nga aktibidad nga ginahimo sa kabukiran.
Sa interview sang Bombo Radyo Bacolod kay Negros Occidental Provincial Administrator Atty Rayfrando Diaz, ang trahedya ang dapat magserbe na nga leksyon nga indi dapat abusaran ang dunang manggad.
Suno diri, ginaself correct sang mother nature ang mga pagpang-abusar sang mga tawo kag ini ang wala sang kaluoy kag wala sang ginapasin-o.
Suno kay Diaz, may mga report ini nga nabatun tuhoy sa mga illegal logging activities kag illegal quarry operations nga ginahimo.
Pahayag sini dapat nga matadlong na ang sala kag maghimo sang tikang agud maprotektahan ang nabilin nga forest cover kag magpatigayon sang mga reforestation activities.
Ang mga kagulangan ang indi lamang source sang tubig ukon source sang biodiversity, sa baylo ini ang nagaserbe nga systema nga nagaprotekta sa balanse sang kalibutan.
Suno kay Diaz, ang watershed protection ang jurisdiction sang Department of Environment and Natural Resources (DENR).
Sila ang nagrequest sang areas kun sa diin pwede makapatigayon sang reforestation, apang wala man sang response sa ila request.
Nagalaom man ini nga magahimo sang tikang ang ahensya agud mapapanabat ang mga may sala, kag ma-implementar ang regulasyon kag layi nga nagaprotekta sa forest covers.
