Natalana nga magsapol subong nga Miyerkules si Governor Eugenio Jose “Bong” Lacson upod ang mga local chief executives sa probinsya agud nga talakayon ang posibilidad nga pagbatak sang enhanced community quarantine antes pa man ang Abril 30.
Sa exclusive interview sang Bombo Radyo Bacolod kay Lacson, ginpahayag sini nga ila pa paga-desisyunan kun i-lift na nila ang ECQ ukon idowngrade ini bangud naganubo nga naganubo naman ang kaso sang mga probable kag suspected cases sang coronavirus disease 2019 (COVID-19) sa probinsya kag pila na ka adlaw nga wala sang narekord nga kaso sang virus diri.
Aminado man ang gobernador nga nabudlayan na ang mga local government units (LGUs) sa pag-sustinir sa pagpakaon sa mga pumuluyo.
Dugang pa ni Lacson nga ila man pagahambalan kun magabukas sila sang economic activity sa probinsya agud nga mabalik ang kita sang pumuluyo.
Apang gin-athag sini nga ila pa ini pagatun-an sang maayo bangud indi niya man luyag nga padalian ang pag-abre sang ekonomiya bangud nga dapat man ikonsiderar ang health crisis sa karon.
Ang pagsinapol ang patigayunon sa Negros Residence takna alas-10:00 karon sa aga kag magapatawag man ini sang press conference pagkatapos agud nga mapahibalo ang publiko tuhoy sa ila nga mga plano para sa ikaayo sang tanan.
