Gin-athag ni Executive Secretary Salvador Medialdea nga ang Malacaniang ang magadeklarar sang Martes, Mayo 3 bilang regular holiday sa pag-obserbar sang Eid’l Fitr ukon ang katapusan sang Islamic holy month nga Ramadan.
Ini bangod nauna na nga ginrequest sang National Commission on Muslim Filipinos kay Presidente Rodrigo Duterte nga ang national holiday sa pagselebrar sa Eid’l Fitr ang ideklarar sa Mayo 3.
Ini naman ang nagamarka sa pagtakop sang balaan nga bulan sang pagpuasa para sa mga Muslim.
Madumduman nga kahapon, nagdeklarar ang Office of the Bangsamoro Mufti nga ang Eid’l Fitr ang hiwaton Mayo 2 ukon subong nga Lunes.
Sa isa ka virtual briefing, gin-anunsyar ni Grand Mufti Abuhuraira Udasan ang starting date para sa event, kasunod sang tradisyunal nga moon-sighting session nga ginpatigayon sang weekend, kadungan sa pagkakita sang new moon.
Isa sa mga pinaka-importante nga okasyon sa Islam, kag kilala man bilang “festival of the breaking of the fast”, ang Eid’l Fitr ukon ang katapusan sang holy month of Ramadan, nga nag-umpisa sang Abril 13 subong nga tuig.
Ginpanugyan man ni Bangsamoro Autonomous Region in Muslim Mindanao (BARMM) Chief Minister Ahod Ebrahim sa publiko nga ipabilin ang paghalong kag ang minimum public health standards sa selebrasyon.
Ini ang patigayunon apisar sang nagapadayun nga pamahog sang COVID-19 pandemic kag ang nagahilapit nga national election subong nga bulan.
Nagalaom ini nga magadaog ang kalinong, pasensya kag paghangpanay sang kada isa.
