Ginpanugyan sang Malacañang sa publiko nga i-report ang anuman nga pag-abuso ukon iregularidad sa pagpili sang beneficiaries sang Presidential Scholarship Program, isa ka educational aid initiative ni President Ferdinand Marcos Jr.
Suno kay Presidential Communications Office (PCO) Undersecretary Claire Castro, mahimo magsumiter sang reklamo sa national office sang Liga ng mga Barangay, Department of the Interior and Local Government (DILG), PCO, ukon Office of the President (OP).
Pahayag sini, bukas ang gobyerno sa mga reklamo agud masiguro nga makalab-ot ang assistance sa mga benepisyaryo.
Ini kasunod sang pamangkot tuhoy sa isa ka social media post angot sa bata sang isa ka barangay official nga gin-report nga nakabaton sang scholarship sa idalom sang programa.
Apang, nagpaandam si Castro batok sa gilayon nga pagpasibangod sa beneficiary.
Suno diri, indi automatic nga disqualified ang mga himata sang barangay officials sa pagbaton sang assistance, basta nakumpleto nila ang mga requirements sang programa.
Dugang pa, may mechanics para sa pagpili sang kwalipikado nga benepisyaryo.
Base sa criteria sang programa, ang beneficiaries dapat graduating college students nga may kabudlayan sa pinansyal nga aspeto.
Ang mga scholars ang ginapili sang barangay officials kaupod ang komitiba sang edukasyon sang Sangguniang Barangay.
Ginpahayag ni Castro nga luyag sang presidente nga mapuslan sang deserving nga mga estudyante sa bug-os nga pungsod ang scholarship program, ilabi na sa mga yara sa malagyo nga komunidad.
