Ginklaro sang Malacañang nga wala sang ihibalo ukon kaangtanan si President Ferdinand “Bongbong” Marcos Jr. sa alegasyon ni anay Department of Public Works and Highways (DPWH) secretary Manuel Bonoan natuhoy sa P24 billion nga “leadership fund” nga gin-alegar gintalana para sa mga senador.
Suno kay Palace Press Officer Undersecretary Claire Castro, kun may ihibalo ang presidente sa nasambit nga pondo, indi ini niya pag-itolerar.
Ginpaanggid ni Castro ang sitwasyon sa isa ka manunudlo kag estudyante nga nagapangopya.
Suno diri, wala nagapangayo sang permiso ang estudyante sa manunudlo agud balion ang rules.
Ginpahayag man ni Castro nga posible ginahimo ini patago.
Suno pa diri, mangin ang incumbent DPWH Secretary Vince Dizon wala man sang ihibalo tuhoy sa alegasyon.
Ginpahayag ni Castro nga indi na magpatawag sang internal investigasyon ang presidente bangud gina-uyatan na sang Sandiganbayan ang kaso.
Dugang pa sini, wala sang amo nga pondo sa proposed 2027 national budget sang DPWH sa idalom sang pagpamuno ni Dizon.
Sa testimoniya ni Bonoan sa Sandiganbayan sang Miyerkules, gin-alegar may tig-P500 million nga alokasyon ang tagsa ka senador samtang P1 billion naman para sa mga may committee chairmanships.
Ginpanginwala naman ini sang pila ka mga senador.
