Ginakahangawa sang labor advocate ang epekto sang tuman nga pagnubo sang balor sang piso batok sa dolyar.
Ini matapos marecord ang historic low nga P64.17 sa kada 1 US dollar.
Sa interview sang Bombo Radyo Bacolod kay Wennie Sancho, secretary-general sang General Alliance of Workers Association (GAWA), ang makabenepisyo sa pagnubo sang bili sang piso amo ang mga may miyembro sang pamilya nga overseas Filipino worker (OFW), kag mga exporters.
Samtang ang maga-antos naman amo ang kabug-usan nga populasyon kag gobyerno.
Ini bangod tanan nga balayran sa mga imported products ang magasaka, kalakip na ang coal power nga ginabayaran sang dolyares.
Ang gobyerno ang may mga loans man sa mga foreign countries nga magasaka naman ang balayran bangod sa mas manubo nga balor sang piso.
Samtang ang pagnubo sang piso ang mahimo man magresulta sa inflation, nga dugang nga palas-anon sang mga pumuluyo.
Ini bangod sa pagmahal sang mga balaklon, ilabi na nga madamo sang ginabaligya sa pungsod nga imported.
Dugang pa sini nga ang P40 tubtob P45 nga sa daily minimum wage sa Negros Occidental kag Bacolod City, nga nasumiter na sa National Wages and Productivity Commission ang halos magatabon na lamang sa ginsaka sa presyo sang mga balaklon.
Pahayag sini nga sa karun nga P550 nga minimum wage sa private sector, ang real value sini ang yara na lamang sa P356, gani may masobra P200 pa nga dapat irestore sa purchasing power sang mga minimum wage earners.
Suno kay Sancho, yara sa kamot sang mga ekonomista ang paghimo sang tikang agud mangin estable ang ekonomiya.
