Nagluntad ang malapad nga grassfire sa Brgy 15, Lizares, Talisay City, kapin alas- 7:00 sang gab-i, kagab-i.
Gilayon nga nagresponde ang Bureau of Fire Protection (BFP)- Talisay.
Sa interview sang Bombo Radyo kay City Disaster Risk Reduction & Management Office (CDRRMO) head Geoffery “Spyxe” Gutierrez, control burning ang ila nga ginhimo kun sa diin ginpa-ubos na lamang nga masunog ang hilamon kumpara nga ini ang ila nga basyahan sang tubig nga posible may mabilin pa kag liwat na naman nga magluntad ang sunog.
Samtang, bangod sa tuman ka init sa area, isa ka man-og nga python ang naggwa kag ini naman ang nadakop.
Panugyan ni Gutierrez, maghalong perme kag indi maghaboy sang upos sang sigarilyo bisan diin lang kag likawan ang pagpanutod.
Samtang, nagdangat naman sa masobra sa P100,000 ang balor sang halit gikan sa sunog nga nagluntad sa Brgy 2, ciudad sang Victorias.
Sa interview sang Bombo Radyo kay Fire Offier 1 Dave Kevin Duavan, fire arson investigator, nasunog ang isa ka boarding house nga human sa light materials.
Suno diri, may yara sang isa ka pamilya nga boarder nga ginalakipan sang amay, iloy kag isa ka bata, kag may yara pa gid sang apat ka iban pa nga mga boarders.
Dugang pa sini, samtang nagadako ang kalayo, nagakatulog ang iloy kag ini ang ginhingagaw sang bana sini nga nagatrabaho lamang sa pihak nga building.
Nagdangat naman sa P127,500 ang balor sang halit sang sunog kun sa diin wala sang may nasalbar nga gamit ang mga biktima.
