Ginkumpirmar sang cluster head sang Infectious Diseases Unit sang Department of Health Western Visayas nga may yara sang 148 nga mga healthcare personnel sa rehiyon nga nakabatyag sang mild symptoms samtang napulo naman ang nakabatyag sang mas seryuso nga sintomas matapos nga matublukan sang COVID-19 vaccine.
Suno kay Dr. Mary Jane Juanico, 18,560 na ka mga doses sang Sinovac vaccine ang nabakuna para sa 1st dose samtang may nakatalana naman nga kaangay nga numero para sa 2nd dose.
Samtang 10 dose naman ang gintalana nga AstraZeneca vaccine nga nabakuna sa lima ka libo nga mga healthcare workers.
Sa kabug-usan nagdangat na sa 23,580 ang nabakunahan nga mga medical personnel sa bilog nga Western Visayas.
Sa ulihi nga data sang Marso 14, ang 13,915 nga ginbakunahan sang COVID-19 vaccine ang 59 porsyento na sang vaccine allocation para sa mga healthcare workers sa Region 6.
Sa karun, padayun naman nga ginahulat ang accomplishment reports gikan sa probinsya sang Negros Occidental, Iloilo City, Iloilo Province kag Bacolod City nga amo ang may pinakadalagko nga alokasyon sa rehiyon.
Ang duha naman ka brand sang bakuna nga una nga nabatun sang Pilipinas ang kaangay nga gintublok sa duha ka doses kun sa diin ang Sinovac Vaccine ang may 28 days interval para sa pagtublok sang ikaduha nga dose samtang ang AstraZeneca vaccine naman ang may 8 weeks interval.
Sa 13,915 nga record sang nabakunahan sang Marso 14, naka-eksperyensya naman sang adverse events kasunod sang pagbakuna ang 158 ka mga healthcare workers kun sa diin 148 diri ang nagbatyag sang mild nga sintomas kaangay sang pagpalangatol, pagtaas sang Blood Pressure kag pagpalangdamol sang pamatyag.
Samtang ang napulo naman ang nakabatyag sang mas serysoso nga sintomas kaangay sang kabudlayan sa pagginhawa kag kabudlayan sa pagtulon.
