260 ka pamilya ang nag-evacuate sa ciudad sang Cadiz kadungan sang pagsaka sang lebel sang tubig bangud sa pag-ulan.
Suno kay Cadiz City Mayor Salvador ‘Bading’ Escalante, masobra 700 ka mga indibidwal ang nag-evacuate nagikan sa pito ka mga barangay kag sila ang nagtinir sa designated evacuation centers sa barangay kaangay sang mga eskwelahan.
Ang pito ka barangay suno kay Escalante ang malapit sa suba kag dagat gani nag-evacuate ang mga ini sang nagdungan ang taob kag daludo sang tubig nagikan sa suba.
Ini ang ginalakipan sang Barangays Sicaba, Luna, Burgos, Daga, Tinampaan, Cabahug kag Barangay Mabini.
Suno kay Escalante, ginpadal-an sang food packs ang mga pamilya kadungan sang ila nga pagpauli.
Aminado ang alkalde nga gintanyagan na ang mga evacuees nga masaylo sa relocation site sang naglabay ang Bagyo Yolanda apang wala sila nagsaylo bangud diri ang ila palangabuhian, apang ila man ginpasalig nga gilayon nga maga-evacuate kun kinahanglanon.
Kaina, magal-umon ang kahawaan sa Cadiz apang wala sang ulan.
Ginpakamaayo naman sang alkalde nga isuspend ang klase halin sa Kindergarten tubtub sa high school agud indi na maggwa ang mga estudyante kasunod sang advisory sang PAGASA nga lauman ang magal-umon nga kahawaan nga may madamol nga pagtupa sang ulan.
