Malapit 200 ka mga pasahero nga padulong kuntani sa Metro Manila ang stranded sa karon sa BREDCO Port kasunod sang suspension sang byahe sang barko bangud sa tropical cyclone wind signal sa Luzon kadungan sang pagwaswas sang Bagyo Ulysses kahapon.
Suno kay Capt. Eduardo De Luna, commander sang Philippine Coast Guard District Southern Visayas, yara sa polisa sang PCG nga indi pagpahanugutan ang pagbyahe sa mga ginahalinan kag padulungan kun yara sa typhoon alert signal no. 1 pasaka.
Santo ini sa Memorandum Circular No. 02 – 2013 sang PCG nahanungod sa severe heavy weather.
Ang mga stranded ang ginalakipan sang 183 ka mga indibidwal, tatlo ka rolling cargoes, isa ka motorsiklo, kag mga commercial container vans nga padulong sa Manila.
Kalabanan naman sa mga sakay sa barko ang nagikan sa probinsya sang Negros Occidental nga makabig naman nga mga locally stranded individuals (LSI).
Kun mangin hilway na ang panahon subong nga adlaw suno kay De Luna, pahanugutan na liwat ang pagbyahe sang barko.
