2,496 ka mga pamilya sa banwa sang Hinigaran nga nagub-an sang balay kadungan sang paglabay sang Bagyo Odette sang bulan sang Disyembre ang nakabaton sang ayuda nagikan sa provincial government sang Negros Occidental subong nga adlaw.
Suno kay Governor Eugenio Jose ‘Bong’ Lacson, P8.6 million ang balor sang roofing materials ang ginpanagtag sa 24 ka mga barangay sa banwa sang Hinigaran nga ginalakipan sang corrugated GI sheets.
Samtang nagpanagtag man sang 2,500 ka banana seedlings sa mga pumuluyo.
Subong nga Marso 24 ang ulihi nga adlaw nga allowed sang Comelec ang pagpanagtag sang ayuda bangud magasugod na ang spending ban bwas, Marso 25, kadungan sang pagsugod sang campaign period para sa local candidates.
Agud indi mamalisyahan nga ini ang nagapangampanya, wala nalang nag-upod si Lacson sa distribusyon sang ayuda kaina.
Madumduman nga nagpain ang provincial government sang P50 million kag nagpalagas sang P13 million nga budget paagi sa supplemental budget agud ibakal sang roofing materials.
Nakabaton man ang probinsya sang P91 million nga ayuda nagikan sa National Housing Authority apang wala pa ini napanagtag tubtub subong.
