Masobra P2.8 million nga balor sang suspected shabu ang nakumpiskar sa isa ka babayi nga subject sang buybust operation nga ginpatigayon sa Purok Kabulakan 1, Barangay Singcang-Airport, Bacolod City kagab-i.
Ang joint buybust operation ang ginpatigayon sang Philippine National Police Drug Enforcement Group Special Operations Unit 6 (PNP DEG SOU6) kag Bacolod City Drug Enforcement Unit (CDEU).
Ang suspetsado ang ginkilala kay Christine Balenario Dacumos alyas Tintin, 36 anyos, high value individual (HVI), residente sa 27th St., Calamba, Sigay, Barangay 2, Bacolod City, apang ini ang nagarenta sa Magsaysay Rd., Barangay Singcang-Airport.
Nakuha sa paghinakop sini ang 415 gramos sang suspected shabu nga ginabanta nagabalor sagng P2,822,000.
Sa pahayag sang PNP DEG Operative, si Dacumos ang wala sang trabaho samtang ang bana sini ang nakahunong naman sa prisuhan bangod man sa pagbaligya sang iligal nga droga.
Madugay naman nila nga ginamonitor ang suspetsado sang yara pa ini sa Purok Sigay, Barangay 2 apang hinali nalang ini nga nadula sa lugar.
Natumod sang mga ini nga naga-arkila ini sang balay sa Barangay Singcang-Airport gani sila ang nagtransaksyon tubtob sa napatigayon ang operasyon.
Simple naman ang pamaagi sang suspetsado sa pagbaligya bangod ginapakadto lang sini sa ila puluy-an ang buyer.
Wala naman sini ginapagamit bilang drug den ang balay, bangod kaupod sini ang iya mga kabataan.
