Nagadangat sa 392 ka mga pamilya ukon kabug-usan nga 1,800 ka indibidwal ang gin-evacuate kahapon sa probinsya sang Negros Occidental.
Suno kay Negros Occidental Provincial Disaster Management Program Division (PDMPD) Head Dr. Zeaphard Gerhart Caelian, ang mga evacuees sa banwa sang EB Magalona ang ginalakipan sang 10 ka indibidwal sa Barangay San Jose; 14 sa Barangay Latasan; 13 sa Barangay Tabigue kag apat sa Barangay Sto. Ninio nga lunsay yara sa karun sa tagsa ka mga Barangay Hall.
Samtang sa Talisay City, 52 ka pamilya ukon 182 ka indibidwal naman ang evacuees sa Barangay Zone 8 nga yara sa karun sa Basketball Court; 17 ka pamilya ukon 198 ka indibidwal sa Barangay Zone 11 nga nahamtang sa chapel sang Barangay; 17 ka pamilya ukon 142 ka indibidwal sa Barangay Zone 12 nga nahamtang sa simbahan; 105 ka pamilya ukon 525 ka indibidwal sa Barangay Zone 14-B nga yara man sa simbahan; anom ka pamilya ukon 30 ka indibidwal sa Barangay Zone 14-A; tatlo ka pamilya ukon pito ka indibidwal sa Barangay Zone 3; isa ka pamilya ukon pito ka indibidwal sa Barangay Zone 10 kag duha ka pamilya ukon 15 ka indibidwal sa Barangay Zone 12-A nga nahamtang sa Barangay Hall.
Samtang 71 ka pamilya ukon 218 ka indibidwal naman ang gin-evacuate sa Barangay Daga sa syudad sang Cadiz.
Sa Silay City, lima ka pamilya ukon 25 ka indibidwal ang gin-evacuate sa Barangay 2; pito ka pamilya ukon 23 ka indibidwal sa Barangay Hawaiian; 12 ka pamilya ukon 46 ka indibidwal sa Barangay E. Lopez; 44 ka pamilya ukon 158 ka indibidwal sa Barangay Mambulac; 29 ka pamilya ukon 109 ka indibidwal sa Barangay Lantad kag 12 ka pamilya ukon 50 ka indibidwal naman sa Barangay Rizal.
Samtang gin-evacuate man ang siyam ka pamilya ukon 24 ka indibidwal gikan sa Barangay Limango sa syudad sang Escalante.
Sa kabug-usan, nagdangat sa 22 ka mga barangay ang apektado sang malala nga pagbaha kun sa diin 392 ang mga pamilya nga gin-evacuate ukon nagdangat sa 1,800 ka indibidwal.
Paathag ni Caelian nga iban sa mga ini ang wala sa evacuation centers, kag nag-evacuate sa mga himata ukon abyan apang ginahatagan gihapon sang relief assistance sang probinsya sang Negros Occidental.
