3, 940 ka mga pamilya sa banwa sang Cauayan ang nakabaton sang corrugated sheets ukon roofing materials nga iilis sa ila balay nga naguba kadungan sang paglabay sang Typhoon Odette sang Disyembre 17.
Ang corrugated sheets ang ginbakal sang provincial government sang Negros Occidental kag iban pa nga mga donors kun sa diin ginpangunahan ni Governor Bong Lacson ang distribution, Pebrero 10 sang aga.
Sa interview sang Bombo Radyo kay Lacson, mga residente sang banwa sang Candoni ang masunod nga makabaton sang roofing materials apang diri na magatapos ang distribution bangud maubos na ang ginbakal nga materyales.
Bangud sini, suguran na sang Kapitolyo ang pagdistribute sang cash assistance sa mga survivors sang bagyo.
Suno kay Lacson, wala na sang problema sa ayuda nagikan sa National Housing Authority gani ini ang pagagamiton na.
Sarang naman mautilize ang pondo nagikan sa Bureau of Treasury matapos nga makadistribute sang financial assistance ang tagsa ka local government unit.
Nagalaom naman ang gobernador nga wala sang duplication agud nga makabaton ang tanan nga apektado.
Nagpasalamat man ang chief executive sa ayuda nga ginhatag sang provincial government sang Isabela.
Malapit duha ka bulan humalin sang naglabay ang Bagyo Odette, aminado ang gobernador nga mas OK na ang kahimtangan sa karon sang mga pumuluyo sa southern Negros.
Narestore naman ang supply sang kuryente sa 85 tubtub 86 porsyento sang franchise area sang Negros Occidental Electric Cooperative kag target nga makumpleto ini sa katapusan sang subong nga bulan.
