49 ka mga estudyante sa Ma-ao Elementary School ang gindala sa Bago City Hospital matapos magpalanuka kadungan sang ila Christmas Party kahapon.
Sa interview sang Bombo Radyo Bacolod kay Roberto Angay, principal sang Ma-ao Elementary School, spaghetti ang ginkaon sang mga ini kag ginkuhaan naman sang City Health Office sang sample agud nga mapaidalom sa laboratory analysis.
Suno kay Angay, samtang nagaselebrar sila sang christmas party kag Grade 1 Day kahapon, may yara sang maestro nga naghatag sa iya sang impormasyon nga may mga bata sa Grade 1 nga nagpalanuka kag gindala sa ospital.
Gindischarge na ang mga bata kagab-i bangud maayo naman ang kondisyon sang mga ini.
Naghatag man sang bulig ang caterer sang ginkaon sang mga bata.
Ginabanta nga subong nga adlaw, makuha ang resulta sang laboratory tests agud matumod ang rason sa ginaalegar nga food poisoning.
Nagpasalig ang tag-iya sang catering service nga magahatag sang bulig pinansyal sa mga estudyante sang Maao Elementary School sa ciudad sang Bago nga gina-alegar nahilo sa ginkaon nga pagkaon sa ila Christmas party kahapon.
Suno kay Jesel Alba, tag-iya sang All-in Restaurant nga amo ang nag-cater sang Grade 1 kag Grade 3 students sa ila party, ini ang labing-una nga tion nga gina-alegar may na-food poison sa ila ginserbe nga pagkaon.
Nahibaluan nga nagbayad sang tag-P100 ang Grade 1 pupil para sa ila spaghetti, fried chicken kag kan-on samtang P150 naman ang sa mga Grade 3 sa lain man nga putahe.
Ginasuspetsuhan ni Alba nga ang spaghetti nga nasulod sa styrofoam nga naghulas amo ang gintunaan sang pagkahilo sang mga bata.
Nahibaluan nga may yara sang kalan-an si Alba sa atubang mismo sang nasambit nga elementary school kag madugay naman sila nga naga-cater sa mga events sang school kag sa iban pa nga bahin sang Bago.
Kahapon may nagbayad na sa Bago City Hospital para sa 49 ka mga pupil nga gindala kag ginapasalig ni Alba nga iya ini ulian.
Samtang, isa man ka manghod sang Grade 1 pupil ang nalakip sa mga naglain ang pamatyag kahapon.
Suno sa amay nga si Peter Jay, nagpauli ang Grade 1 niya nga bata nga may dala nga spaghetti kag ginpakaon niya sa iya manghod.
Bangud sini, wala nahilo ang Grade 1 nga magulang kundi ang iya manghod.
Sa karun ginahulat pa ang resulta sang mga test sa sample nga ginkuha sang mga bata agud mahibaluan kun anu gid ang gintunaan sang ila pagkahilo.
