48 tanan ka mga salakyan ang na-impound sa pagpanakop sang Bacolod City Land Transportation Office (LTO) bangod sa pagbayolar sa traffic rules, pampubliko man ukon pribado.
Sa 48 nga salakyan nga na-impound, 40 diri ang traditional jeepney, duha ang modernized jeepneys, tatlo ang taxi, isa ka van kag duha ka motorsiklo.
Sa 40 nga nadakop nga mga traditional jeepneys, 35 sa mga ini ang bangod sa wala sang provisional authority samtang ang iban ang may expired nga Certificate of Public Convenience (CTC).
Nahibaluan nga nagadangat sa P120,000 ang balayran sang mga traditional jeepney units nga wala sang provisional authority nga madakpan nga nagabyahe.
Sa interview sang Bombo Radyo Bacolod kay Bacolod City Administrator Atty. Pacifico Maghari III, ang iban nga mga nagkaladakpan, ang may-ara lamang sang penalty nga P5,000 kaangay sang mga wala sang lisensya kag mga kaso sang reckless driving.
Paathag ni Maghari nga humalin pa sang Hulyo sang ginpasanyog sang LTO ang ila operasyon agud matapna ang pagbyahe sang mga colorum nga salakyan kag ginpalab-ot naman sang ahensya sa Bacolod City Government nga ang pagsanyog sang pagbantay sang tanan nga traffic violators ang magalawig tubtob sa pagtakop sang tuig.
