Ginpahayag sang bise alkalde sang ciudad sang Bacolod nga 15 lamang gikan sa 72 ka mga Badjao nga ginpabalik sang Iloilo City government ang nalakip sa 80 nga yara sa orihinal nga listahan sang Bacolod.
Sa interview sang Bombo Radyo Bacolod kay Familiaran, nga amo nagtindog nga acting Mayor samtang wala sa syudad si Bacolod City Mayor Alfredo “Albee” Benitez, ginpahayag sini nga nagpagwa naman sang explanation letter si Department of Social Services and Development (DSSD) Head Sally Abelarde, nga nagatinlo sang pangalan sang Bise Alkalde nga ini ang wala sang ihibalo sa aktibidad.
Dugang pa ni Familiaran nga gintinguhaan man sini nga magcontact kay Iloilo City Mayor Jerry Treñas, apang nauna na ini nga nagpagwa sang statement nga nagabuya sang malain nga tinaga.
Bilang tawo, ini nagresulta man agud nga siya ang magbuya man sang indi husto nga tinaga batok sa alkalde.
Wala naman ini sang pakialam sa ginpagwa ni Treñas nga Executive Order nga nagadeklarar sa iya bilang Persona non Grata, kag nagatudlo nga siya ang nagmando sa pagdala sang badjao sa Iloilo City.
Matapos ginpabalik sang Iloilo City government ang mga natipon nila nga 72 ka mga badjao, ini ang gilayon man nga ginbatun sang DSSD kag ginpahamtang sa Youth Center sa Arao para sa profiling.
Didto natukiban sang Anti Mendicancy Task Force nga 15 lamang gikan sa 72 ang kabahin sa 80 nga nagikan sa Bacolod City.
May nakita man nga School ID sa isa sa mga Badjao nga nagapakita nga ini ang estudyante sa isa ka buluthuan sa Iloilo City kag may-ara man sang Business Clearance nga naka-address man sa nasambit nga ciudad.
Ginalantaw sang bise alkalde nga kabahin sa mga natipon ang mga nagikan na nga daan sa Iloilo City.
Ang mga Badjao ang ginbyahe na kagab-i padulong sa Dumaguete kag gikan didto sila ang igabyahe padulong sa Dapitan kag Zamboanga.
