Nagpasalamat ang punong barangay sang Barangay Handumanan, Bacolod City sa opisyales sang syudad sang Bacolod nga natigayon ang mass testing.
Sa interview sang Bombo Radyo Bacolod kay Punong Barangay Ricardo Danoy, nagdangat na sa 68 ang natigayon nga mapaidalom sa swab testing kag ginalakipan ini sang mga residente nga nangin kabahin sang contact tracing nga nakaupod sa mga nagpositibo sa balatian.
Suno kay Dela Vega, nagtawag man sa iya ang barangay secretary sang isa ka barangay agud magpahibalo nga may isa ka residente sang Handumanan nga nagpadulong sa barangay nga ginpamunuan sang abyan niya kag nakapalapit sa residente nga positibo sa balatian gani ginpahingagaw contract trace apang ang bana lang sang residente ang nakita samtang padayon naman nga ginapangita ang residente.
Nangin mahinalungon man sila bangud hugot nga ginapatuman sa Barangay Handumanan ang “No Facemask No Faceshield No Entry” nga polisa kag may ginbutang man sila nga disinfectant sa gym kun sa diin ginpatigayon ang swabbing.
Nagpasalamat man ini nga nagakooperar ang mga pumuluyo.
Ginpahayag man ni Danoy nga may walo na tanan ka mga pumuluyo sang nasambit nga barangay nga ginlakipan sang barangay kagawad ang nagpositibo sa balatian.
Suno kay Danoy, nakahibalo na nga daan ang mga residente nga ipaidalom sila sa swab test gani wala na sila nagpamalibad pa.
Ang mga napaidalom sa swab test ang iquarantine samtang nagahulat sang resulta.
