Nagdangat sa kapin P700 mil nga balor sang illegal nga druga ang nakompiskar sang kapulisan sa ciudad sang Bacolod sa bilog nga bulan sang Mayo subong nga tuig.
Sa interview sang Bombo Radyo kay Bacolod City Police Office spokesperson Police Major Sherlock Gabana, 96.396 grams sang suspected shabu ang nakumpiskar sa kabug-usan nga 50 ka police operations sang tinalikdan nga bulan kag may balor ini nga masobra sa P655 mil.
Nagdangat naman sa 49 ka mga wanted persons ang nadakpan sa 49 ka mga police operations.
Ini ang ginlakipan sang lima ka most wanted person kag 44 ka wanted persons sa kaso nga rape, murder, frustrated murder, homicide kag theft.
Sa loose firearms naman, lima ka mga armas ang nakumpiskar sang mga police stations samtang sa kampanya naman sa Oplan Katok ukon sa mga gunholders nga may mga lisensya, 28 tanan ka mga armas ang nasungka ukon nadeposit sa PNP.
40 naman ka mga persona nga nagahampang sang illegal nga bulang ang nadakpan sa 40 ka mga police operations kag napulo diri ang napasakaan sang kaso.
Nagpanugyan naman si Gabana sa tanan nga nagaintra sa illegal nga pagpanahor nga wala nagauntat ang mga kapulisan sa pagpatigayon sang police operations apisar nga may pandemya.
Ginpasalamatan man sini ang mga kapulisan sa Bacolod City Police Office nga nagapabilin nga aktibo sa pagtuman sang ila nga duties and responsibilities.
Nagapasalamat man si Gabana sa mga pumuluyo sa ila kooperasyon sa kampanya sang mga kapulisan sa illegal nga druga kag kriminalidad.
