Malapit 80 ka mga pulis sa ciudad sang Bacolod ang ginpaidalom sa random drug test kahapon nga adlaw, bilang kabahin sang internal cleansing sang Philippine National Police.
Sa interview sang Bombo Radyo Bacolod kay Police Lt. Ma. Liberty Indiape, 78 tanan ka mga police personnel nagikan sa Bacolod City Police Station 1 tubtob Bacolod City Police Station 10 kag Bacolod City Police Office ang nakuhaan sang urine sample.
Random nga ginpili ang mga police personnel nga magpaidalom sa random drug test, indi kaangay sang una nga may yara sang ginbutang nga designated nga kuhaan sang sample.
Suno kay Indiape, ginalauman nga marelease ang resulta sang drug test sa masunod nga semana.
Ginpahayag man sang tagpamaba nga obligado sila nga magpaidalom sa drug test bilang kabahin sang programa sang Philippine National Police.
Suno diri, ang random drug testing ang regular naman nga ginapatigayon sa PNP kag magapadayon ini tubtob nga maubos ang tanan nga BCPO personnel subong nga tuig nga magpaidalom sa random drug test.
Madugay naman nga practice sa PNP ang random drug test apang mas ginpa-intensify bangud sa internal cleansing.
Ginaengganyo man sang tagpamaba sa tanan nga BCPO personnel nga magpaidalom sa random drug test nga programa sang PNP.
Nagalaom man ang tagpamaba sang Bacolod City Police Office nga wala sang magapositibo sa mga police personnel nga ginpaidalom sa random drug test kahapon nga adlaw.
