Gin-aprubahan sang Sangguniang Panlalawigan sang Negros Occidental ang general fund supplemental budget number 4 nga nagabalor sang P97,903,500 para ibakal sang mga equipment kag re-agents sa Molecular Laboratory sa Teresita Lopez Jalandoni Provincial Hospital sa ciudad sang Silay.
Suno kay Provincial Administrator Atty. Rayfrando Diaz, ang pondo ang nagikan sa P100 million special purpose appropriation para sa pagpatukod kag pagkaayo sang TLJPH agud nga mag-akomodar sang COVID-19 patients.
Apang, gin-reprogammed ini nga gamiton na lamang para sa pagbakal sang mga gamit sa Molecular Laboratory kasunod sang hingyo ni Governor Eugenio Jose “Bong” Lacson.
Suno diri, mas importante kag mas kinahanglanon sa karon ang pagbakal sang test kits bangud sa pagdinaguso sang mga repatriated overseas Filipino workers kag locally stranded individuals.
Madumduman nga una na ginpahayag sang gobernador nga plano sang provincial government nga magbakal sang dugang nga 20 mil ka mga test kits.
Dugang pa ni Diaz nga ang konstruksyon sa TLJPH extension para sa mga COVID-19 patients sa palaabuton ang ipadayon lamang paagi sa phase by phase gamit ang pondo sang probinsya.
