Malapit isa ka gatos ka mga pulis ang nagbantay sa University of Saint La Salle halin kagab-i para sa matawhay nga pagpila sang mga registrants kadungan sang ulihi nga adlaw sang voter registration subong nga Sabado.
Indi magnubo sa isa ka libo ang nagpila agud nga makaparehistro kun sa diin naglab-ot na sa Doctor’s Hospital ang linya.
Sa interview sang Bombo Radyo kay Police Major Ritchie Gohee, station commander sang Bacolod Police Station 4, alas-12:00 sang tungang gab-i nagsugod ang deployment sang mga pulis sa gwa sang USLS kag nagsugod ang pagpila sa mga tawo alas-2:00 sang kaagahon.
Suno diri, wala na nagpatuman sang curfew sa mga registrants bangud mapuno ang Police Station 4 kun dakpon ang mga nagahulat nga makapila.
Dako naman ang bulig sang pagbutang sang railings tubtub sa Doctor’s Hospital agud nga makontrol ang crowd sang tawo kag isa lang ang pila.
Ang railings ang ginprovide sang Bacolod Traffic Authority Office.
Ang nagbantay nga mga pulis ang ginalakipan sang 16 ka personnel sang Police Station 4, 20 nagikan sa Mobile Patrol Unit, 20 ka miyembro sang Mobile Force Company, 30 nagikan sa City Legal Office Enforcement Team kag nagtemprano man abot sa lugar ang mga traffic enforcers agud nga madiriher ang dalagan sang trapiko.
Madamo naman sa mga nagpila ang wala nakaparehistro bangud 500 lang ang maakomodar sang Commission on Elections kada adlaw.
