BACOLOD CITY – Kapin sa isa ka milyon nga balor sang suspected shabu ang narecover sang mga kapulisan sa ciudad sang Silay kahapon sang hapon.
Natigayon nga marecover sang mga katapo sang Silay City Police Station kaupod ang Drug Enforcement Unit (DEU) operatives, Philippine Drug Enforcement Agency (PDEA) Negros Occidental, Negros Occidental Police Provincial Office (NOCPPO), Special Weapons and Tactics (SWAT) kag Regional Public Safety Batallion 6 ang isa ka dako nga sachet sang suspected shabu, anom ka medium sachet sang suspected shabu, duha ka elongated plastic sachet sang suspected shabu, kag iban pa nga mga drug paraphernalia nga yara sa pag-inakop ni Mark Velasco, legal ang edad kag Junray Jumatay,nga lunsay mga pumuluyo sang Sitio Iglesia, Brgy. Balaring Silay City.
Nakapalagyo naman si Velasco sang nagpatigayon sang buy-bust operation ang mga katapo sang kapulisan sa nasambitan nga lugar, apang arestado naman ang kaupod sini nga si Jumatay.
Yara na sa karon nahamtang si Jumatay kag ang mga narecover sa crime scene sa kustodiya sang Silay City Police Station.
