Ginsugtan sang Robinson’s Place Bacolod management ang request sang Commission on Election – Bacolod nga ma-extend ang oras sang voter’s registration matapos sang mga ini ginpataas sa 800 ang gincater nga registrants.
Sa interview sang Bombo Radyo Bacolod kay Bacolod City Election Officer Atty Katrina Trinio Caña, aminado ini nga tuman ka damo sang mga nagtuyo nga magparehistro subong nga adlaw, ilabi na nga weekend.
Ini bangod halos 95 porsyento sang mga nagparehistro ang mga estudyante.
Aminado man ini nga may delay sa pagsugod sang ila voter’s registration kaina sang aga bangod sa nagluntad nga kinagamo kag pagdinas-okanay sa pila.
Ginapakamaayo man sini nga sa bulig sang security sang mall kag kapulisan, namanage ang sitwasyon.
Suno kay Caña, gab-i pa lamang may mga nagpila na sa gwa, kag aminado ini nga organisado ang nauna nga pila.
Apang sang magsugod na ang pagpasulod sang voter registrant, may-ara na sang mga nagtabok sa barikada kag nagsal-ot agud mauna sa linya.
Aminado man ang Comelec officials nga hungod nila nga wala ginhatag sang temprano ang numero agud kuntani maseguro nga first come first serve ang proseso.
Pahanumdom naman sini nga ang senior citizen kag persons with disability ang ginahatagan priority kag indi na kinahanglan magpila upod sa regular registrants.
Bangod sa kadamuon sang nagpila nga sa estimate, nagdangat sa lima ka libo, imbes nga ang usual nga 600 nga ginacater nga nagaparehistro, ginpasaka nila ang gincater sa 800.
Ini ang ila nga akumodaron, regardless kun ano man oras matapos, gani ginapakamaayo sini nga nagsugot ang management sang mall nga sila ang maka-extend.
Nahibaluan nga tubtob alas-5:00 sang hapon lamang kuntani ang operasyon sang satellite voter’s registration santo sa agreement sa mall.
Samtang ginklaro man ni Caña nga indi mahimo patigayunon ang satellite registration sa mga Barangay bangod may 61 ka Barangay sa Bacolod City, samtang 10 ka adlaw lamang ang gintalana nga registration period.
Pahanumdom na lamang sang Comelec officials sa mga magaparehistro nga kompletuhon na ang requirements antes maglakat, kaangay sang valid ID kag photocopy sini.
Sa 15 tubtob 18 anyos, kinahanglan naman ang birth certificate, photocopy sang birth, kag valid ID.
Sarang magamit ang school ID, apang dapat ini ang valid sa subong nga School Year.
