Patay ang motorcycle rider matapos makabunggo sa tanker truck sang Amity Volunteer Fire Brigade sa Lacson extension sa Barangay Singcang-Airport, Bacolod City kagab-i.
Ginkilala ang biktima kay Joseph Ordeneza kag residente sang Purok Ilaya, Barangay Taloc, Bago City, Negros Occidental.
Pasado alas-10:00 kagab-i sang natabo ang aksidente apang subong lang nga aga natumod sang imbestigador sang Bacolod City Police Station 8 ang biktima paagi sa mga valid identification cards nga nakita sa tool box sang motorsiklo.
Halin si Ordeneza sa north direction sang nakabungko sa tanker truck matapos nga magtabok sa dalan Magsaysay.
Bangud sa katodo sang impact, nagsuhot si Ordeneza sa tanker truck kag nabuka ang iya helmet nga nagresulta sa iya kamatayon.
Sa interview sang Bombo Radyo Bacolod sa driver sang tanker truck nga si Ariel Menor, residente sang Purok Calumbo, Barangay Malubon, Sagay City, Negros Occidental, siya mismo ang nakibot nga tuman ka dasig ang pagpadalagan sang motorcycle rider apisar nga may malabayan ini nga stop light.
Suno diri, gintinguhaan pa ni Ordeneza nga ilikaw ang motorsiklo sini apang nagslide padulong sa iya direksyon.
Gin-overlap ni Ordeneza ang lane sang ginamaneho sini nga tanker truck.
Sang wala pa nagslide ang motorsiklo sang biktima suno kay Menor, yara na ini sa center line samtang naga-amat-amat siya pahinay sa pagpadalagan bangud malapit na ini sa stop light kag intersection.
Ginpahayag man sang tanker truck driver nga tuman ka dasig ang pagpadalagan ni Ordeneza nga sa pagbanta sini masobra 70 kilometers per hour.
Suno kay Menor, bisan wala nakaslide ang motorsiklo sarang ini sa gihapon malab-ot sa direction sang ginamaneho niya nga tanker truck.
Padulong kuntani si Menor sa shopping area agud magbalik sa base sang Amity Fire Volunteer Brigade samtang papauli naman sa syudad sang Bago ang biktima sang nagluntad ang aksidente.
Samtang, ginpahayag man sang hepe sang Bacolod City Police Station 8 nga nagpadulong na sa police station ang utod sang biktima kag nagpahayag nga indi pa siya makadesisyon kun mapasaka sang kaso.
Suno kay Police Major Joery Puerto, nakahatag na sang partial nga bulig ang driver sang tanker truck agud maplastar ang bangkay sang biktima.
Suno diri, mahimo nga nagikan sa downtown ang biktima bangud nagapadulong ini sa south nga direksyon.
Suno kay Puerto, ang biktima ang mall technician sa isa ka mall sa syudad sang Bacolod.
