Ginkumpirmar sang Provincial Administrator sang Negros Occidental nga indi pa kampante si Governor Eugenio Jose “Bong” Lacson nga buksan sa publiko ang Mambukal Mountain Resort sini nga tuig.
Sa interview sang Bombo Radyo kay Atty. Rayfrando Diaz, ginpahayag sini nga sa iya pagbasa sa panghuna-huna sang gobernador, medyo nagaduha-duha pa ini nga buksan ang resort sini nga tuig bangud indi niya luyag nga i-engganyo ang mga pumuluyo nga maglagaw sa tunga sang pandemic.
Suno kay Diaz, lantawon pa sa masunod nga tuig ang trend sang virus apang sini nga tuig, alang-alang pa ini nga mabuksan.
Aminado man ang provincial administrator nga luyag naman sang gobyerno nga maabrehan ini sa publiko sa madasig nga tinion apang indi nila pag-irisgo ang kabuhi kag ikaayong lawas sang mga pumuluyo.
Suno kay Diaz, mas ginahatagan prayoridad sang probinsya ang kaluwasan sang mga pumuluyo sang sa income nga sarang makuha kun magbukas na ang resort.
