Ginsuguran na ang paglimpyo sang Mambulok Creek nga napuno naman liwat sang basura.
Madumduman nga indi na makailig ang tubig sa Mambulok Creek nga ginalantaw nga rason sang pagbaha sa reclamation area sang tinalikdan nga semana.
Aminado naman ang mga residente sa Purok Lampirong, Barangay 2 nga indi lang sila ang nagahaboy sang basura sa sapa kundi ang mga pumuluyo man sa naibabaw nga barangay.
Sa interview sang Bombo Radyo kay Punong Barangay Emelda Banguanga sang Barangay 2, Bacolod City, nagpasalamat ini sa city government sa ginapatigayon nga clean-up drive.
Ang clean-up drive ang ginapatigayon sang Department of Public Works and Highways, City Engineer’s Office kag Department of Public Services.
Tatlo ka barangay ang ginalabayan sang Mambulok Creek nga ginalakipan sang Barangay 2, 8 kag 10.
Kun matapos ang clearing operations suno kay Banguanga, mas maayo nga butangan ini sang kudal agud indi na maghaboy sang basura sa creek ang mga residente.
Mas maayo man suno sa punong barangay kun masami ginapatigayon ang clean-up operations.
Aminado ini nga nalipay ang mga residente nga ginalimpyuhan na ang sapa.
