Ginturn over sang provincial government sang Negros Occidental ang management sang duha ka mga district hospitals sa tagsa ka mga local government units (LGUs) sini.
Nahibaluan nga gin-aprubahan sang Sangguniang Panlalawigan ang deeds of usufruct para sa Calatrava District Hospital sa LGU sang Calatrava kag Vicente Gustilo District Hospital sa city government sang Escalante.
Sa interview sang Bombo Radyo Bacolod kay Governor Eugenio Jose “Bong” Lacson, ginpahayag sini nga willing man ang duha ka mga LGUs sa pagdumala sang tagsa ka mga district hospitals kag iya man ginkumpirmar nga may yara gihapon sang subsidy nga ihatag ang probinsya sa duha ka mga ospital kaangay na lamang sa ginahimo sa Sagay City kag Cauayan.
Suno kay Lacson, oportunidad man ini para sa Calatrava kag Escalante City nga mapataas ang ila local income.
Nakadepende na karon sa mga LGUs kun ila I-absorb ang mga empleyado sang provincia government nga naka-assign sa duha ka mga ospital.
Nahibaluan nga ang duha ka mga ospital ang nahamtang sa first district sang probinsya.
