Ginklaro sang manager sang Angel In Us Transport nga sarang gid makapadulong sa ila opisina ang mga taxi drivers agud madiskusyunan ang natuhoy sa P5,000 nga fuel assistance kag sa ila shortages sa remittance.
Ini kasunod sang pagdangop sang pila ka taxi driver sa Ipa-Bombo Ta segment sang Bombo Radyo Bacolod bangod sa alegasyon nga wala na ginrelease sa ila ang P5,000 nga ayuda gikan sa Land Transportation and Franchising and Regulatory Board (LTFRB).
Sa interview sang Bombo Radyo Bacolod kay Jess Bantillo, ang ila nga boss ukon ang operator amo ang nagkuha sang tseke sa LTFRB, apang ini ang talagsa lamang kun magbisita sa ila opisina.
Suno diri, mabuot ang ila boss, kag ini ang maalwan nga tawo, gani pasalig sini nga wala gid problema kun magpadulong sa ila ang mga driver kag mag-ayo nga kinahanglan nila ang P5,000 nga ayuda.
Suno diri, antes paman, madamo sang mga driver nga nagpahayag nga ibuhin na lamang sa ila nga utang ang mabatun nga ayuda.
Sa pihak sini, ginahatag nila ang P5,000 kun wala sang utang, kag ginabuhinan lamang kun may gamay lamang nga utang, apang nakadepende sa driver kun pila ang luyag nila nga ibuhin.
Suno sa iya, ang Angel In Us Transport ang may kapin isa ka gatos nga taxi units, apang 60 ka units lamang ang naga-operate sa karun bangod madamo sang nag-untat nga driver tuga sang ma-iwat nga byahe.
Ang ila nga boundary ang P850 lamang.
Pahayag sini nga sa kaalwan sang ila boss, bisan iban sa ila driver ang nagdangat na sa P50,000 ang utang, ini ang wala ginkakas kag ginpahanugutan lamang nga makabyahe agud ma amat-amatan ang utang.
Pahayag ni Bantillo nga 99 percent sa mga drivers ang may utang.
Suno diri, ang shortages sa remittances sang mga driver ang nag-umpisa sang pandemic, kag mas naglala pagid sang tuman ka dako ang ginsaka sa presyo sang gatong.
Sa pihak nga bahin, may mga taxi drivers man sila nga ginlakip sa ginsumiter nga pangalan kag nakapasa man sang requirement apang wala madala sa payout.
Sa karun, ginahulat pa nila ang reply sang LTFRB sa pamangkot.
Natingala man si Bantillo nga may nagdangop sa Bombo, bangod maalwan man ang ila nga operato.
