Wala na sang kabuhi sang nasapwan sa probinsya sang Guimaras ang isa ka mamanagat nga ginaalegar naigo sang kilat sa tunga sang dagat sa bahin sang banwa sang Valladolid.
Sa interview sang Bombo Radyo Bacolod kay Police Captain Celso Omega, Deputy Chief of Police sang Valladolid Municipal Police Station, ang insidente ang natabo alas 8:00 ang takna sang gab-i nga gin-alegar nga ang residente sang Central Tabao ang naigo sang kilat sa tunga sang kadagatan samtang nagapangisda.
Suno kay Omega, ginkilala ang biktima kay Dennis Gegonia, 59 anyos, residente sang Central Tabao, Valladolid.
Suno diri sa imbestigasyon, alas-7:00 ang takna sang gab-i naglakat ang biktima kaupod si Robert Garde agud bisitahan ang ila nga fish case ukon tangaban.
Sang ang biktima ang nagsaka sa ibabaw sang tangaban, nagpabilin sa bangka si Robert.
Hinali lang nangilat kun sa diin nagkuob ini para sa iya nga safety apang pagtangla sini wala na si Gegonia.
Ginpangita ni Garde ang biktima apang wala makita gani gilayon ini nagpatakas agud nga magpangayo sang bulig.
Sa bulig sang Bantay Dagat, DRRMO sang Valladolid kag Philippine Coast Guard Pulupandan Sub Station gilayon nga nagpatigayon sang Search and Rescue Operation apang wala gid ini makita.
Kahapon sang aga, nakabaton ang Bantay Dagat sang Valladolid sang impormasyon nga may nakita nga tawo nga nagalutaw sa inampulugan island Sibunag, Guimaras.
Ginkadtuan man ini sang rescuers, Bantay-dagat kag coast guard kag positibo nga natumod ang biktima.
