Natalana nga patigayunon subong nga semana ang mandatory training para sa mga elected Sangguniang Kabataan kag Mass Oathtaking para sa elected Barangay Officials kag Sangguniang Kabataan.
Sa interview sang Bombo Radyo kay Ma. Joy Marideth Madayag, city director sang Department of the Interior and Local Government Bacolod, dapat magpaidalum sa mandatroy training ang mga elected SK officials antes ang pag-assume sa opisina.
Suno diri, Nobyembre 10 patigayunon ang training para sa mga SK alas 8:00 sang aga tubtob alas 5:00 sang hapon sa isa lamang ka batch nga session.
Alas 6:00 naman sang hapon sa amo man nga adlaw, magapatigayon sang mass oath taking para sa mga elected Barangay officials kag Sangguniang Kabataan.
Nobyembre 13 tubtob Nobyembre 30, maga-assume office na ang mga nagdala-og sa Barangay and Sangguniang Kabataan Elections.
Apang, ginalauman pa nga patigayunon sini nga bulan sang Nobyembre ukon sa masunod nga Disyembre ang training para sa mga Punong Barangay kag Barangay kagawad samtang ginahulat pa ang module naggikan sa Commission on Elections kag DILG.
Samtang, nakapagwa na sang guidance kag memorandum si Bacolod City Mayor Alfredo Albee Benitez angot sa mga ulubrahon sang Barangay and Sangguniang Kabataan officials.
Pahanumdom ni Madayag, dapat pangapyutan sang mga opisyales ang memo nga gin-issue sang alkalde nga mangin pagsulundan sang ila tarabaho.
