BACOLOD – Ginapreparahan karun sang Department of the Interior and Local Government (DILG) Negros Occidental ang patigayunon nga mandatory training kag eleksyon sang Sangguniang Kabataan (SK) federation.
Suno kay DILG Negros Occidental head Engr. Carmelo Orbista, patigayunon ang isa ka adlaw nga mandatory training sa tunga -tunga sang May 17-26 samtang ang eleksyon sang SK federation nagakinanglan nga matapos naman antes ang Mayo 29.
May yara man sang isa ka adlaw nga orientation antes ang SK federation.
Samtang sa karun nagahimo man ang DILG Negros Occidental sang module para sa training sang mga punong barangay antes ang ila pagpanumpa sa pwesto sa Hunyo 30.
Tinutuyo sini nga mapahibalo sa mga elected officials ilabi na ang mga bag-uhan ang mga programa sang ahensiya partikular na ang sa kampanya kontra droga.
Suno kay Orbista, cien porciento naman sa karun nga may yara na sang Barangay Anti-Drug Abuse Council (BADAC) ang tanan nga lugar sa probinsiya.
Nagapadayon man ang implementasyon sang DILG Negros Occidental sang mga programa sini ilabi na ang monitoring sa mga barangay officials nga gina-alegar imbulbado sa iligal nga druga.
Suno kay Orbista padayon ang monitoring kag validation sa nasambit nga mga barangay officials.
Sang damlag lang naguwa ang report nga may yara sang 21 ka kagawad kag 3 ka punong barangay sa Negros Occidental nga gina-alegar imbulbado sa iligal nga druga.
