Nagapati ang pinuno sang inter-agency task force against COVID-19 sa Bacolod City nga disbentaha para sa ciudad ang ginpagwa nga mando sang national IATF nga ang mga returning overseas Filipino (ROF) nga may negative nga RT-PCR test result ang papulion na lang sa ila mga puluy-an kag indi na pag-ipaidalum sa swab test.
Sa interview sang Bombo Radyo kay Vice Mayor El Cid Familiaran, nanugunan ini sang effort sang local government nga pagquarantine sa mga nauna nga ROF bangud madamo sa mga ini ang negatibo paghalin sa Metro Manila apang positibo na sa virus pag-abot sa Bacolod.
Suno kay Familiaran, mangin unfair man ini para sa mga locally stranded individuals bangud pareho man lang sila nga nagikan sa gwa sang ciudad apang magapaidalum sila sa quarantine.
Suno sa iya, posible nga wala na sang kwarta ang national government kag ang Overseas Workers Welfare Administration (OWWA) bangud depleted naman ang mga resources.
Apisar nga wala ini nagakompormi, suno sa bise-alkalde, wala ini sang may mahimo bangud ang nasambit nga abiso ang nagikan sa national government.
Suno diri, nagpamatok man ang ciudad sa pagsinapol kahapon kaupod ang regional IATF kag nagpadala sang apelasyon sa national IATF.
Suno sa iya, tuman ka delikado kun dayunon ang pagpasulod sa mga ROF nga wala sang swab test kag aminado man ini nga bangud diri, nadulaan na siya sang gana nga mag-ubra.
Nagapati naman ini nga maayo nga tikang ang pagpaidalum sa Bacolod City sa general community quarantine (GCQ) bangud para man sa kamayuhan sang tanan ang pagpahugot sang quarantine measures.
Samtang, nag-abiso naman si Councilor Israel Salanga sa mga OFWs nga nakaquarantine sa mga hotels sa ciudad nga pahanugutan lang nga magpauli ang mga “fresh” pa ang RT-PCR test ukon mga nakaabot sa ciudad pito ka adlaw matapos makuha ang resulta sang swab test.
Suno kay Salanga, kun sobra sa pito ka adlaw antes makaabot ang ROF sa ciudad, kinahanglan sini nga tapuson ang 14 days quarantine sa hotel.
Gindugang man sini nga kun may yara sang luyag nga magreklamo, ipadangat ini sa Department of Health bangud ila ini guidelines kag sila ang nagaabiso sa mga City Health Office doctors.
