Kasubo ang gindangatan sang pag-inom sang mag-ulutod sang makahulubog nga ilimnon matapos mapatay sang magulang ang iya manghod nga nagasaulog pa sang kaadlawan sa Cauayan, Negros Occidental, Martes sang gab-i.
Sa interview sang Bombo Radyo Bacolod sa hepe sang Cauayan Police Station nga si Police Major Lowell Garinganao, naglalisay ang magulang nga si Roger kag ang iya manghod nga si Juaquino Cadungog samtang nagainom sa ila balay sa Sitio Patol, Barangay Caliling.
Ginlampusan sang 41-anyos nga biktima ang iya 43-anyos nga magulang sang matig-a nga bagay sa ulo antes ginsumbag.
Nagtuyo pa kuntani ang magulang nga pakalmahon ang iya manghod apang wala ini nag-untat gani nagkuha si Roger sang wasay sa dingding sang ila balay kag ginlabo ang biktima sa ulo nga nangin tunaan sang iya kamatayon.
Gilayon naman nga nagsungka sa Cauayan Municipal Police Station ang suspetsado matapos ang krimen.
Suno sa hepe, wala na sang plano ang pamilya nga magpasaka sang kaso batok sa magulang.
