Nangin maayo ang pag-abi abi sang mga pumuluyo kay Most Rev. Louie P. Galbines, D.D., ang ikapito nga obispo sang Diocese of Bacolod.
Kahapon, madamo sang mga pumuluyo nga ginabug-usan sang mga tumuluo kag mga estudyante ang naghulat sa mga dalanon halin sa banwa sang Hinigaran padulong sa ciudad sang Bacolod.
Pila ka mga Catholic schools sa ciudad sang Bacolod ang nagkanselar sang klase tubtob subong nga adlaw Agosto 11, para sa arrival kag canonical installation sang nagbulos nga obispo sa Diocese of Bacolod.
Subong nga adlaw may yara sang patigayunon nga road closure sa downtown sa bahin sang Bacolod Public Plaza humalin alas 6:00 ang takna sang aga tubtob alas 12:00 sa udto para sa patigayunon nga prusisyon antes ang seremonya para sa canonical installation ni Most Rev. Galbines, D.D.
Ginpasalamatan ni Galbines ang mainit nga pag-abi abi sa iya bilang bag-o nga obispo.
Naghingyo man ini sang pagpangamuyo gikan sa mga tumuluo.
Samtang, nagpabutyag sang bug-os nga suporta kag pagsalig si outgoing Bishop Most Rev. Patricio Buzon, D.D. sa pag-abot sang bag-o nga Obispo sang Diocese sang Bacolod nga si Most Rev. Louie P. Galbines, D.D.
Sa interview sang Bombo Radyo Bacolod kay Bishop Buzon, tumandok gid sa lugar kag pamilyar na si Bishop Galbines sa Bacolod.
Suno sa outgoing bishop, pormal siya nga magabalik sa Cebu para magpuyo sa komunidad sang Salesians of Don Bosco para mahatagan sang ligwa ang bag-o nga Obispo sa Diocese of Bacolod sa pagpamuno.
