Hulaton kag lantawon ang mangin sitwasyon sa patigayunon nga transport strike kag rally protest sang mga unconsolidated traditonal jeepney drivers sa Bacolod City subong nga adlaw.
Ini ang ginpahayag sang deputy head sang Bacolod Transportation and Traffic Management Department (BTTMD) kasunod sang ginapahayag nga patigayunon nga aktibidad sang mga drivers kag operators sang unconsolidated traditonal jeepneys.
Sa interview sang Bombo Radyo Bacolod kay Jose Antonio “Jojo” Robello, lantawon pa nila ang mangin dalagan sang trapiko kag ang sitwasyon kun madayon ang transport strike kag rally protest.
Suno kay Robello, sang nakaligad ginpreparahan nila ang ginapahayag nga transport strike kag rally protest apang wala man nadayon gani subong lantawon pa nila.
Suno diri, wala man sang rerouting magluwas nalang kun may yara sang matabo kaangay sang komosyon sa tunga sang mga nagarally kag mga kapulisan sa atubang sang isa ka hotel sa dalan Lacson sang tinalikdan nga tuig.
Panugyan sini dapat respetuhon sang mga nagarally ang wala nag-upod sa ila kag indi pagbalabagan sa tion nga nagabiyahe.
