Wala pa makita tubtob sa karun ang isa ka mangingisda nga nahulog sa ginasakyan nga pumpboat sa ciudad sang Silay, Negros Occidental kahapon sang kaagahon, Marso 18.
Nahibaluan nga sakay sa pumpboat nagpadulong ang mga ini sa nasambit nga baybayon sa pagpati nga madamo sang makuha nga isda, apang nakahibalo man ang mga ini nga mabudlay pangisdaan ang lugar.
Ang namissing amo si Bongbong Flores, 40 anyos, may asawa kag may kabataan.
Sa interview sang Bombo Radyo Bacolod kay Joshua Recomono, kaupod sang namissing, ginasag-a ni Flores ang tubig sa sulod sang pumpboat apang bangud mabaskog ang balod mahimo nga nahulog ini matapos maout balance.
Suno kay Recomono, sang nakita sini ang ila nga upod, nagpundo ang mga ini apang bangud sa mabaskog nga balod wala na ini nakita pa.
Antes paman sang hitabo, nagpanugyan si Flores kay Recomono nga padasigon ang pumpboat bangud nagadali ini kay may trabaho pa.
Samtang gin-athag ni Recomono nga si Flores amo ang nagdesisyon nga sa nasambit nga baybayon managat sa pagpati nga madamo sang makuha nga isda, apang sa baylo diutay lamang ang ila nakuha.
