Nasapwan na ang bangkay sang mangingisda nagikan sa Victorias City, Negros Occidental nga namissing matapos masagairan sang barko ang ila sakayan samtang nagapangisda sa parola sa banwa sang Ajuy sa probinsya sang Iloilo sadtong Mayo 23.
Sa interview sang Bombo Radyo kay Commander Jansen Benjamin, pinuno sang Coast Guard Station Negros Occidental, ginpahayg sini nga bangud sa padayon nga search and rescue operations nga ginpatigayon sang otoridad kag mga kaupod man sini, natigayon nga makita ang bangkay ni Marlon Adigue alas 05:00 ang takna kaina sang aga.
Ang bangkay ang nasapwan ni Joel Tamaga sa Brgy. Nasidra, Ajuy, Iloilo.
Positibo naman ini nga ginkilala sang himata sini kag gilayon nga gindala sa Villa Miranda, Victorias City, Negros Occidental kun sa diin nagapuyo ang mangingisda.
Madumduman nga alas-11:00 sang gab-i sang Mayo 23, 2020 sang nabungguan sang barko ang fishing boat nga ginasakyan nanday Marlon Andigue kag Agustin Flor sang Zone III, Barangay Pasil, Victorias City.
Bangud sa impact, ginalantaw ni Flor nga naglabog si Adigue nagikan sa ila motorbanca kag wala pa nakit-an tubtub subong.
Nakatigayon naman nga makabalik sa Victorias City si Flor kag nakapangayo sang bulig sang mga otoridad.
