Nasapwan ang bangkay sang 34 anyos nga mangunguma nga may-igo sang bala sa Sitio Dugma, Brgy. Malatas, Calatrava, Negros Occidental alas-9:00 kaina sang aga.
Ang biktima ang ginkilala nga si Nilo Salumag, may live-in partner, mangunguma, kag residente sa nasambitan nga lugar.
Kapin alas-9:00 kaina sang aga, ginreport ni Punong Barangay Celsa Doremon sa Calatrava Municipal Police Station nga may-ara sang nasapwan nga bangkay nga may-igo sang bala.
Sa imbestigasyon, natumod nga nasapwan sang mangunguma nga si Alyas Bobong ang bangkay samtang ini ang padulong sa ila uma kapin alas-9;00 sang aga.
Apang antes paman sini, alas-7:30 sang aga, nakita ang biktima nga nagalakat upod kay Alyas Jepoy, nga ginsundan sang pila ka lupok sang armas-luthang, apang ginpawalaan lamang sang mga residente.
Sa inisyal nga imbestigasyon, ginalantaw mga personal grudge ang motibo sa krimen.
Ini ang ikatatlo na nga kaso sang asod-asod nga shooting incident sa banwa.
Sang Marso 25, ginpatay man ang 41 anyos nga mangunguma sa sulod mismo sang iya balay sa Sitio Calanugan, Brgy. Minapasuk; samtang kahapon, patay man ang 39 anyos nga si Alyas Boy matapos ginluthang sang nagpakilala buyer sang patay sini nga citrus fruit sa Sitio Cambalogbog II, Brgy. Telim, Calatrava.
