Patay ang isa ka mangunguma kag anay kandidato sa pagka-kapitan matapos gintiro sang tatlo ka wala makilal-an nga mga lalaki sa sulod sang iya farm sa Purok Malipayon, Barangay Marcelo banwa sang Calatrava, Negros Occidental alas-6:30 kahapon sang aga, Nobyembre 11.
Ginkilala ang biktima nga si Alyas “Maximo”, 48-anyos, kasado, mangunguma kag residente sang Purok Beñalon, Barangay. Marcelo, Calatrava, Negros Occidental.
Sa interview sang Bombo Radyo kay Police Captain Jesus Alba, hepe sang Calatrava Municipal Police Station, pag-abot sang mga otoriadad sa lugar kun diin natabo ang insidente nadala na ang biktima sa ospital.
Ang insidente natabo sa higad sang highway, lapit sa barangay hall sang nasambit nga lugar.
Suno diri, ang suspek ang nagasul-ob sang face mask kag nagabitbit sang armas ang nagsulod sa manokan sang biktima kag ini ang gilayon nga gintiro sang makatatlo ka beses.
Samtang wala pa makilal-an ang mga suspek.
Ang biktima ang naigo sa guya, liog kag likod nga bahin sang lawas nga amo ang gintunaan sang iya kamatayon.
Gilayon nga gindala ang biktina sa Alfredo E. Maranon Sr. Memorial District Hospital, Sagay City apang gindeklarar nga patay.
Narecover sang mga kapulisan ang isa ka caliber .45 kag isa ka fired case sang 12-gauge ammunitions.
Nahibaluan nga sang tinalikdan nga bulan nakabaton sang death threat si Maximo.
Padayon pa ang imbestigasyon sang mga kapulisan kun nakabaton ba ang biktima sang death threat antes ang insidente.
Kag gina-usisa man ang cellphone sini agud mahibaluan kun may mga persona nga nagapamahog sa iya.
