Patay ang isa ka mangunguma kag miyembro sang ACT-CIS matapos ginluthang sang Biyernes, Hulyo 29 sa Sitio Langoni, Prk 10, Brgy. Inayauan, banwa sang Cauayan, Negros Occidental.
Ginkilala ang biktima kay Panpelo Maban, 63 anyos kag residente sang nasambit nga lugar.
Sa interview sang Bombo Radyo Bacolod kay PMaj. Anthony Grande, hepe sang Cauayan Municipal Police Station, ang shooting incident ang natabo alas-10:40 ang takna sang aga sang Biyernes.
Suno kay Grande, ginpahayag sang asawa sang biktima nga pagkatapos sang bana sini nga mag-arado sa ila uma nga ginabanta 35 kilometros ang kalayuon nagikan sa town proper sang Cauayan, nagpauli ini sa ila balay kun sa diin timing man nga naggwa ang apat ka mga lalaki nga may dala nga M-16 rifle kag ini ang ginaestorya.
Kasunod sini ginbayaan sang asawa ang biktima samtang nagasugilanon sa apat ka suspetsado apang sa iya nga pagbalik nagakayaon na kaga wala na sang kabuhi ang iya nga bana.
Santo sa imbestigasyon sang mga kapulisan walo ang entrance sang bala sa lawas ni Maban kag walo man ang exit santo sa empty shell nga nakuha sa crime incident.
Ang biktima ang ginapahayag nga active member sang Anti-Crime and Terrorism Community Involvement and Support Partylist (ACT-CIS).
Nagapadayon pa sa karun ang imbestigasyon sang Cauayan Municipal Police Station agud nga matumod ang motibo kag may kahimuan sang krimen.
