Patay ang isa ka mangunguma matapos gintiro sang mga wala pa makilal-an nga armado nga grupo sa sulod mismo sang iya balay sa Sitio Calanugan, Brgy. Minapasuk, Calatrava, Negros Occidental kahapon sang kaagahon, Marso 25, 2025.
Sa interview sang Bombo Radyo Bacolod kay Police Major Wilfredo Benoman, Chief of Police sang Calatrava Municipal Police Station, may yara sang reported nga shooting incident apang ini ang late reported na kag ini ang natabo sa Sitio Calanugan kun sa diin nabukid nga bahin sang nasambit nga banwa.
Suno kay Benoman, ang biktima ang ginkilala kay alyas Cy, 41 anyos, mangunguma kag residente sang nasambit nga lugar.
Mga alas 2:00 ang takna sa kaagahon may yara sang nagpukaw sa ila sang kalive in sini nga ginkakibot nila kun sa diin nakita nila ang kapin tatlo ka mga armado nga tawo.
Ang biktima ang ginhagad sang mga armado nga mag-upod sa ila sa Sitio Yamingon sa nasambit nga Barangay apang wala ini nagpasugot.
Bangud sini wala sang madamo nga estorya gintindakan sang nasambit nga mga persona ang puertahan kag ginsulod ang balay kag ginpaarakan sang tiro ang biktima nga gintunaan sang kamatayon sini.
Matapos ang pagpaniro ang mga wala matumod nga suspetsado ang nagpalagyo sa wala mahibaluan nga direksyon.
Narecover gikan sa crime scene ang isa ka fire cartridge case sang caliber. 45 pistol, isa ka fired bullet/ slug sang caliber. 45 pistol kag isa ka shotgun cartridge case.
Nagapadayon sa karun ang imbestigasyon sang Calatrava Municipal Police Station agud nga matumod ang motibo kag may kahimuan sang krimen.
