Patay ang isa ka mangunguma matapos gintiro sang gwardiya sa isa ka hacienda sa banwa sang Hinigaran diri sa probinsya sang Negros Occidental kaina sang aga.
Suno kay Police Major Jake Barila, hepe sang Hinigaran Municipal Police Station, benepisyaryo sang Comprehensive Agrarian Reform Program ang biktima nga si Julius Dimaguiba samtang ginkilala naman ang suspetsado kay Roger Belonio nga nagagwardya sa hacienda nga tupad lang sang duta nga ginatalauma sang biktima.
Santo sa inisyal nga imbestigasyon, ginasita ni Belonio ang himata ni Dimaguiba nga nagagarab sang hilamon nga napier sang nagsampot ang biktima sa Hacienda Villabale, Barangay Tuguis.
Nagluntad ang komprontasyon sa tunga sang mga ini tubtub nga gintiro ni Belonio si Dimaguiba.
Naigo ang biktima sa natuo nga ilok kag naglapos sa nawala nga bahin kag gindeklarar nga patay sang mag-abot sa ospital.
Gilayon nga nagpalagyo si Belonio matapos ang insidente.
Padayon sa karon ang hot pursuit operation sang mga kapulisan agud nga madakpan ang gwardiya.
