Padayon pa ang imbestigasyon sang mga pulis agud matumod kun sin-o ang nagtiro-patay sa 39 anyos nga mangunguma sa Sitio Nasuli, Barangay Camalobalo, banwa sang Hinigaran kahapon sang hapon.
Ang biktima ang ginkilala kay Ryan John Gelisanga sang amo man nga lugar.
Suno sa stepsister sang biktima nga si Starry Dawn Geniera, nagalakat si Gelisanga sa makitid nga dalan sa higad sang katubuhan agud nga magkuha sang iya karabaw sang nabatian ni Geniera ang madamo nga lupok.
Paggwa sini sa ila nga balay, nakit-an niya ang iya stepbrother nga nagahamyangon sa duta kag puno sang dugo, samtang gilayon naman nga nagpalagyo ang mga suspetsado.
Gindala ini sa Hinigaran Medical Clinic apang gindeklarar nga dead on arrival bangud sa siyam ka igo sang bala sa nagkalain-lain nga bahin sang iya lawas.
Narecover sa crime scene ang fired cartridges sang caliber .45 pistol kag caliber .9mm pistol.
